ХЭЛ СОЁЛЫН ЦӨМ БОЛОХ НЬ

Abstract

Хэл бол биологи үндэстэй соёлын үзэгдэл юм. Хүний тархи, амны хөндий, хоолойн анатоми зэрэг нь соёлын хосгүй бүтээл болох хэлийг боломжтой болгодог. Гэхдээ хэл хэдийгээр соёлын бүтээл ч гэлээ эргээд соёлын , цөм, тулгуур болдог гайхалтай тогтоц билээ. Харин хэлний энэ тогтоц бүрэн бүтэн байж л соёлын найдвартай тулгуур болно. Хэлний тухай бодохдоо ихэнх хүн түүнийг зөвхөн яриа төдийхөн болгож ойлгох хандлага бий. Гэтэл хэл нь дуу авиа, яриа, бичиг гэх мэт өөр хоорондоо холбоотой ч ялгаж ойлгохоос өөр аргагүй функци, дадал, чадвараас бүрддэг. Хэл яриа нь сэтгэлгээг илэрхийлдэг, бичиг бол яриаг тэмдэглэдэг гэж зарим судлаач үздэг ч үнэн хэрэг дээрээ яриа, бичиг хоёрын нэгдсэн тоглолт хэлний хөгжлийг хангадаг ажээ. Бичиг, яриа хоёр язгуур онцлогоо хадгалж байж, хосгүй нэгэн хэлийг хамтдаа бүрэлдүүлнэ.