БАРААНЫ ГАРАЛ ҮҮСЛИЙН ДҮРМИЙН ХЭЛЭЛЦЭЭ: БНСУ-МОНГОЛ УЛС ХООРОНДЫН ХЭЛЭЛЦЭЭНД АНХААРАХ ЗАРИМ АСУУДАЛ

Abstract

Орчин үеийн дэлхийн худалдааны систем болон бүс нутгийн хэлэлцээрүүдэд гарал үүслийн дүрэм (ГҮД)-ийн хэрэглээ нь хамгийн чухал асуудлуудын нэг болоод байна. ГҮД-ийг бүс нутгийн худалдааны хэлэлцээрүүдэд үр дүнтэй, зөв хэрэгжүүлэн мөрдсөнөөр гишүүн орнуудын худалдаа, хөрөнгө оруулалтыг нэмэгдүүлэх эдийн засгийн ач холбогдлыг нэмэгдүүлдэг. Гэвч бүс нутгийн хэлэлцээрүүд улам нэмэгдэхийн хэрээр олон янзын ГҮД хэрэглэгдэж байгаа нь Дэлхийн гаалийн байгууллага (ДГБ)–ын гишүүд болон хувийн хэвшлийнхэнд томоохон сорилтыг дагуулж байна. МУ, БНСУ хоорондын эдийн засгийн түншлэлийн хэлэлцээрийг байгуулах хэлэлцээний үе шат эхэлсэн бөгөөд ГҮД-ийн хэлэлцээ хийхэд зайлшгүй анхаарах асуудлууд байдаг. Тиймээс энэхүү судалгааны ажлын хүрээнд тус улстай хэлэлцээр байгуулах нөхцөлд ГҮД-ийн талаар анхаарах асуудлыг тус улстай хэлэлцээр байгуулсан улсуудын туршлагыг харьцуулах, мөн өмнө судлагдсан эрдэмтдийн бүтээлүүд дээр тулгуурлан судаллаа.