Цайрын оксидын нанонунтагийн фотокаталитик шинж чанарын судалгаа

Abstract

Цайрын оксид (ZnO) нь хориотой бүсийн өргөн нь 3.3 эВ хагас дамжуулагч оксид бөгөөд цайрын оксидын өвөрмөц электроны, оптикийн, биологийн шинж чанаруудыг нь биосенсор, хагас дамжуулагч, гоо сайхны бүтээгдэхүүн, нарны зай болон катализаторын технологид өргөн хэрэглэгдэж байна. Энэхүү судалгааны ажлаар цайрын оксидын нанонунтагийг цайрын ацетилацетонитыг бензилийн спиртын уусмалд эргэх хөргөгчтэй халааж, органик золь гелийн аргаар синтезлэн гарган авч физик химийн шинж чанарыг судлав. Гарган авсан ZnO нанонунтагийн рентген бүтцийн анализын судалгаагаар гексагональ вюрцит бүтэцтэй болохыг тогтоов. Харин жижиг хэсгийн морфологийг ТЕМ-ээр үзэхэд бөмбөлөг хэлбэртэй, диаметр нь дунджаар 35 нм байсан бөгөөд нилээд агрегацид орж бөөгнөрсөн болох нь харагдав. Цайрын оксидын фотокатализын судалгааг ZnO нанонунтагийн нөлөөгөөр родамин 6G будагч бодисын хэт ягаан туяаны муж дахь задралын кинетикийг судлах замаар гүйцэтгэж байна.