ХАДНЫ ЗУРАГ ДАХЬ ОРООМОГ ДҮРСНИЙ УТГА, БЭЛГЭДЛИЙН ТУХАЙ

Abstract

Энэхүү өгүүлэлд Монгол Алтайн нурууны төв хэсгээс шинээр илэрсэн хадны зургуудад тохиолдож байгаа ороомог дүрсний тухай болон буган хөшөө, хадны зургаадад тохиолддог ороомог дүрсний утга зүйн талаар өөрсдийн саналыг дэвшүүлж байна. Уг дүрслэл нь нүүдэлчдийн соёл, шашин, уламжлал, зан заншил, ертөнцийг үзэх үзэлд нэвт шингэсэн байх ба хадны зурагт ховор, харин буган хөшөө, Пазырык булшнаас гарсан эд өлгийн зүйлс, Хүннүгийн ширмэл ширдэг зэрэгт нар зөв болон нар буруу эргэсэн байдлаар нэлээд дүрслэгджээ. Эл дүрслэлийн утга зүй бэлгэдлийг янз бүрийн соёлд өөр өөрөөр тайлбарласан ба ихэнхдээ үхэл, амьдрал, мөн нарыг бэлгэдсэн дүрслэл хэмээн үзэж байгаа бол бидний зүгээс хүний толгойн орой болон гар хөлний хурууны өндөгт байх эргүүлгийг бэлгэдсэн болов уу? хэмээн үзэж байна.