ЕВРЕЙН УЛС ТӨРИЙН СЭТГЭЛГЭЭ

Abstract

Еврейн улс төрийн сэтгэлгээ (Jewish Political Thought-Еврейская политическая мысль)- еврей үндэстний шашин номын хүмүүс, нийгэм-улс төр, гүн ухааны сэтгэгчдээс еврейчүүдийн овог, аймаг, нийгэм, улс төрийн амьдрал, төрийн байгуулал, шашин ба төр, ард иргэд ба хааны хоорондын харилцаа, захирах захирагдах ёс, Израйлын төр улсын түүх, хувь заяа зэрэг асуудлыг эргэцүүлэн бясалгаж сэтгэсэн гурван мянга орчим жилийн түүхтэй үзэл санаа, сургаал, номлол, үзэл суртал, онолын баримтлалын цогц нийлбэрийг илэрхийлсэн ерөнхий ойлголт. Еврейн улс төрийн сэтгэлгээ нь еврей угсааны ард түмний түүх, нийгэм, улс төрийн амьдрал, бусад орон, үндэстэнтэй харилцсан гадаад харилцаа зэрэг түүхэн нөхцөл, бодит байдлыг тусган бүрэлдэж, уламжлагдан иржээ. Еврейн улс төрийн сэтгэлгээ өрнөдийн улс төрийн сэтгэлгээний уламжлалаас хэд хэдэн онцлогоороо ялгаатай бөгөөд тэдгээр нь өрнөдийнх шиг философийн ямар нэг тогтолцоонд голлон суурилаагүй, төр ёсны урт түүхтэй уламжлал, төрийн аль нэг тогтвортой байгууллын тусгал болж хязгаарлагдаагүй, хамгийн сайн засаг төрийг хэрхэн яаж үүсгэн байгуулах вэ гэсэн асуултыг шууд тавьж хариу тайлбар өгөөгүй явдал юм