Announcements

“МУИС-ийн эрдэм шинжилгээний сэтгүүл эрхлэн хэвлүүлэх журам”-ын дагуу “Сэтгүүл зүй” сэтгүүлд өгүүлэл хүлээн авах журамтай танилцана уу.

НЭГ. МУИС-ИЙН ЭРДЭМ ШИНЖИЛГЭЭНИЙ БИЧИГ “СЭТГҮҮЛ ЗҮЙ” СЭТГҮҮЛИЙН ТОВЧ ТАНИЛЦУУЛГА

1.1 Ерөнхий мэдээлэл

МУИС-ийн Сэтгүүл зүй, олон нийтийн харилцааны тэнхимээс эрхлэн гаргадаг “Сэтгүүл зүй” эрдэм шинжилгээний бичиг нь сэтгүүл зүй, олон нийтийн харилцааны салбарыг хамарсан эрдэм шинжилгээний ажлыг нийтэлдэг, хянан магадалгаа хийгддэг сэтгүүл юм. 2001 оноос хойш тасралтгүй нийт 23 дугаар гарч олны хүртээл болсон. Сэтгүүлд эрдэм шинжилгээний өгүүллээс гадна тойм өгүүлэл, товч тэмдэглэл, номын  шүүмж зэргийг хэвлүүлэх боломжтой.

Өгүүллийг  монгол, англи хэл дээр хүлээн авна.

Сэтгүүлийн талаарх дэлгэрэнгүй мэдээлэлтэй www.journal.num.edu.mn хаягаар орж танилцана уу.

1.2 Хянан магадалгаа хийх үйл явц 

Сэтгүүлд ирүүлсэн бүх өгүүллийг хоёроос доошгүй шинжээч уншиж хянан магадалгаа хийнэ.

Өгүүллийг хүлээн авмагц сэтгүүлийн хариуцлагатай нарийн бичгийн дарга өгүүллийн техникийн шаардлага хийгээд зохиогчдод зориулсан зааврыг баримталсан байдал зэрэгт урьдчилсан үнэлгээ хийнэ. Сэтгүүлийн шаардлагыг хангаагүй нөхцөлд өгүүллийг хүлээн авахаас татгалзаж, хариуг зохиогчид илгээнэ.

Шаардлага хангасан бүтээлийн сэтгүүлийн редакторуудад шилжүүлнэ. Редактор өгүүллийн агуулга, үр дүн, сэтгүүлийн зохион байгуулалтын шаардлагад нийцэж буй эсэхийг шинжилж шаардлага хангасан тохиолдолд мэргэжлийн шинжээчдэд хянан магадалгаа хийлгэхээр илгээнэ. Сэтгүүлийн шаардлагыг хангаагүй нөхцөлд өгүүллийг хүлээн авахаас татгалзаж, энэ талаар зохиогчид мэдэгдэнэ.

Хянан магадалсан шинжээчээс өгүүллийг сайжруулахтай холбоотой ирсэн саналыг сэтгүүлийн зүгээс зохиогчид илгээж, зааврын дагуу сайжруулсан тохиолдолд хэвлэх шийдвэр гаргана.

1.3 Өгүүллийн оригинал анхдагч байдал ба бүтээлийн хулгай

Зохиогчид өөрсдийн туршилт судалгааны үр дүнд тулгуурлан оригинал анхдагч бүтээл туурвисан байх шаардлагатай бөгөөд хэрэв бусдын бүтээлийг ашигласан бол зохих ёсоор эш татсан байх ёстой.  Бүтээлийн хулгай нь аль ч хэлбэрээрээ ёс зүйгүй үйлдэл бөгөөд иймд түүнийг хүлээн зөвшөөрөх, хэвлэн нийтлэх боломжгүй юм.

Сэтгүүлийн редактор өгүүллийг үнэлж, түүний агуулга болон зохиогчийн эрхийн асуудалтай холбоотой сэтгүүлийн стандартад нийцэхгүй зүйл илэрсэн тохиолдолд хэвлэхээс татгалзах шийдвэр гаргах эрхтэй.

Зохиогчид өгүүллийг зохиогчийн өөрийн туршилт судалгаагаар гарган авсан, урьд өмнө хэвлэгдэж байгаагүй, бусад сэтгүүлд хэвлүүлэхээр илгээгээгүй, тухайн өгүүлэлд тусгагдсан үр дүн нь хуурамч биш, бусдын бүтээлийг хууль бусаар ашиглаагүй, сэтгүүлийн зохиогчдод тавигдах шаардлагыг хангасан болохыг сэтгүүлийн редакцад батлан хэлсэн байх шаардлагатай. Хавсралт дахь зохигчийн мэдүүлгийн загварыг бөглөж, сканердаж явуулна уу.

1.4 Хэвлэн нийтлэх нөхцөл ба зохиогчийн эрх

Нэгэнт хянан магадалгаа хийгдэж, хэвлэгдэхээр зөвшөөрөгдсөний дараа зохиогчийн зүгээс өгүүлэлд техникийн шинж чанартай засвараас өөр буюу агуулга, үр дүнгийн шинж чанартай өөрчлөлт оруулахыг хориглоно.

Туршилт судалгааны үр дүнг бий болгох, боловсруулах, өгүүллийг бичихэд тодорхой хувь нэмэр оруулсан судлаачдыг зохиогчийн жагсаалтад оруулах ёстой. Өгүүллийг бэлтгэхэд зохиогчид ямар хувь нэмэр оруулсныг тодорхойлсон байх шаардлагатай.

Зохиогчийн эрх нь хамгаалагдсан бусад судлаачдын бүтээлийг ашиглах тохиолдолд бүтээлийг ашиглах, эх сурвалжаас хуулбарлах зөвшөөрлийг зохиогчид өөрсдөө авах үүрэгтэй.

Зохиогчид өөрсдийн бүтээлийг хэвлэн нийтлэх эрхийг тус сэтгүүлд шилжүүлэх нөхцөл бүхий гэрээ байгуулна. Хавсралт дахь зохиогчийн эрх шилжүүлэх гэрээний загварыг бөглөж, сканердаж явуулна уу.

 

ХОЁР. ӨГҮҮЛЭЛД ТАВИГДАХ ШААРДЛАГА

2.1. Өгүүллийн хэлбэр

“Сэтгүүл зүй” сэтгүүлд эрдэм шинжилгээний өгүүлэл, тойм өгүүлэл, товч тэмдэглэл, номын шүүмж хэвлүүлэх боломжтой.

• “эрдэм шинжилгээний өгүүлэл” гэж туршилт судалгааны үр дүнг боловсруулж, шинэ мэдээллээр баяжуулан нэгтгэж бичсэн шинжлэх ухааны бүтээлийг хэлнэ. Эрдэм шинжилгээний өгүүлэл нь ном зохиол, хүснэгт, зургийг оруулалгүйгээр 9000-аас илүүгүй үгэнд багтаж бичигдсэн байна. Эрдэм шинжилгээний өгүүлэлд хянан магадалгаа хийгдэнэ.
• “тойм өгүүлэл” гэж судалгааны тухайлсан чиглэлээр, эсвэл тодорхой нэг сэдвийн хүрээнд өмнө хийгдсэн судалгаанууд болон сүүлийн үед бий болсон шинэ мэдээлэл, бүтээл туурвилын талаар дүн шинжилгээ хийж, системчилж тоймлосон бүтээлийг хэлнэ. Тойм өгүүлэл нь ном зохиол, хүснэгт, зургийг оруулалгүйгээр 11,000-аас илүүгүй үгэнд багтаж бичигдсэн байна. Тойм өгүүлэлд хянан магадалгаа хийгдэнэ.
• “товч тэмдэглэл” гэж судалгааны шинэлэг үр дүн, өвөрмөц арга зүй, шинэ технологи зэргийг агуулсан, шуурхай хэвлэж мэдээлэх шаардлагатай эрдэм шинжилгээний өгүүллийн богино хувилбарыг хэлнэ. Товч тэмдэглэл нь нийт 3000-аас илүүгүй үгэнд багтаж бичигдсэн байна. Хянан магадалгаа хийх эсэхийг сэтгүүлийн редактор шийдвэрлэнэ.
• “номын шүүмж” гэж сэтгүүлийн хамрах хүрээний чиглэлээр хэвлэгдсэн эрдэм шинжилгээний нэг сэдэвт бүтээл, сурах бичиг, гарын авлагын агуулга, үр дүн, бичлэгийн талаар судлаач өөрийн шүүмж, санал дүгнэлтээ илэрхийлсэн товч бичвэрийг хэлнэ. Номын шүүмж нь сэтгүүлтэй холбоотой шинэ номын товч тойм, шүүмж (1000 үгээр хязгаарлагдана). Сэтгүүлийн редакцын хяналт үнэлгээгээр хэвлэх эсэхийг шийдвэрлэнэ. 

 

2.2. Өгүүллийн зохион байгуулалт, техникийн шаардлага

Сэтгүүлд хэвлүүлэх өгүүлэл нь сэтгүүл зүйн онол, түүх, шүүмж, практик, арга зүйн асуудалтай холбоотой байна.

 

Өгүүллийг дараах дарааллаар бичнэ:

1. Өгүүллийн нэр;
2. Зохиогчдын мэдээлэл;
3. Түлхүүр үгс;
4. Оршил;
5. Үндсэн хэсэг: Материал ба арга зүй, Үр дүн;
6. Дүгнэлт: Хэлэлцүүлэг;
7. Талархал;
8. Эшлэл;
9. Ашигласан бүтээлийн жагсаалт;
10. Хураангуй англи хэл дээр;
11. Өгүүллийн гарчиг, зохиогчийн нэр англи хэл дээр.

 

• Өгүүллийн нэр- Энэ нь бүтээлийн агуулгыг илэрхийлэхүйцээр оновчтой томьёологдсон байх ёстой. Шаардлагатай нөхцөлд дэд гарчгийг нэмж болно.

 

Бичиглэл: Arial 14, бүгдийг том үсгээр, нүүрийг голлуулж бичнэ.

Загвар:

ШИНЖЛЭХ УХААНЫ СЭТГҮҮЛ ЗҮЙН ОНОЛ, ПРАКТИКИЙН ЗАРИМ АСУУДАЛД

• Зохиогчдын мэдээлэл- Зохиогчдын овог нэр, эрдмийн зэрэг цол, албан тушаалыг бичнэ.

Бичиглэл: Arial 12, Sentence case, хоёр талаас тэгшилж бичнэ.  

Загвар:

М.Зулькафиль*

*МУИС-ийн Сэтгүүл зүй, олон нийтийн харилцааны тэнхимийн профессор, шинжлэх ухааны доктор (Sc.D)

 

• Түлхүүр үгс: Онлайн хайлт хийх, өгүүллийн агуулгыг илэрхийлэх зориулалттай 8-аас илүүгүй түлхүүр үгийг оруулна. Түлхүүр үгэнд гарчигт орсон үгсийг давтаж оруулахаас зайлсхийнэ.

Бичиглэл: Arial 12, Sentence case, хоёр талаас тэгшилж бичнэ.  

Загвар:

Түлхүүр үгс: Шинжлэх ухааны хялбаршуулсан сэтгүүл зүй, мэдээллийн шинэ технологи, шинжлэх ухааны блог, эрүүл мэндийн сэтгүүл зүй, сэтгүүл зүйн соён гэгээрүүлэх үүрэг

Оршил: Оршил хэсэгт тухайн чиглэлээр өмнө хийгдсэн судалгааны ажлыг тоймлон, улмаар өөрсдийн судалгааны зорилго,  дэвшүүлсэн таамаглал зэргийг тусгана. 

Үндсэн хэсэг: Материал ба арга зүй, үр дүн хэсгээс бүрдэнэ. Үндсэн хэсэг болон үүнд багтаж буй дэд хэсгүүдэд гарчиг өгөлгүй шууд бичнэ. Бичиглэл: Arial 12, Sentence case, хоёр талаас тэгшилж бичнэ.  

Материал ба арга зүй: Энэ хэсэгт өөрсдийн судалгаанд ашигласан материал, цуглуулсан мэдээлэл, хийсэн ажиглалтын дүн мэдээг тусгана. Түүнчлэн хээрийн ба лабораторийн, туршилт ба ажиглалтын судалгаанд ашигласан арга техник, өгөгдөл ба түүврийг боловсруулсан статистикийн ба бусад аргыг дурдана. 

Үр дүн: Үр дүнгийн хэсэг нь зөвхөн өөрсдийн бий болгож илрүүлсэн үр дүнгийн үзүүлэлтээр хязгаарлагдах бөгөөд бичвэр нь хүснэгт, зураг дээр өгөгдсөн мэдээллийг давхардуулж болохгүй, гэхдээ тэдгээрийг тайлбарлаж болно. Статистик үзүүлэлтийг оруулахдаа ашигласан шинжүүр, түүврийн хэмжээ, чөлөөний зэрэг, магадлалын түвшин зэргийг дэлгэрэнгүйгээр бичих хэрэгтэй.

Дүгнэлт болон хэлэлцүүлэг: Хэлэлцүүлэгт үндсэн үр дүн, ололт, тэдгээрийн хүчин төгөлдөр байдлын талаарх хэлэлцүүлгийг ижил чиглэлээр өмнө нь хэвлэгдсэн бусад бүтээлүүдтэй харьцуулж дүгнэх, түүнчлэн ажлынхаа ач холбогдлын талаарх хэлэлцүүлгийг багтаасан байх шаардлагатай.

Талархал: Судалгааг хийж гүйцэтгэхэд тусалж дэмжсэн хүмүүс, санхүүжүүлсэн байгууллага г.м.-д илэрхийлэх талархлын үгсийг оруулж болно.

Эшлэл: Бүтээлд  гурваас доошгүй эшлэл авсан байна.  

Текстийн дунд эшлэл авахдаа анхаарна уу:

Эшлэлийг APA style-аар оруулсан байх ёстойг анхаарна уу. Тус хэв маягаар эшлэл авахдаа Word file-References-Insert citation-Add new source гэж сонгоод дараах мэдээллүүдийг оруулахад эшлэл автоматаар текстийн дунд орно.

• Type of source: Энэ хэсэгт ном, номын бүлэг, сэтгүүл, хурлын эмхэтгэл, веб сайт, ярилцлага, кино, кэйс зэргээс тохирохыг сонгоно.
• Author: Энэ хэсэгт эш татаж буй бүтээлийн зохиогчийн бичнэ. Олон зохиогчтой бүтээлээс эш татаж байгаа бол corporate author-ийг чеклэж холбогдох мэдээллийн оруулна.
• Title: Эш татаж буй бүтээлийн гарчгийг бичнэ.
• Year: Эш татаж буй бүтээлийн хэвлэгдсэн оныг бичнэ.
• City: Эш татаж буй бүтээлийн хэвлэгдсэн хотыг бичнэ.
• Publisher: Шаардлагатай тохиолдолд хэвлэсэн газрыг бичнэ.
• Өгүүллийн бичвэр дунд эшлэлийг дараах байдлаар харагдана.

Нэг зохиогч: Aoki (1990) эсвэл (Aoki, 1990);

Хоёр зохиогч: Beck and Woas (1993) эсвэл (Beck & Woas, 1993);

Хоёроос дээш зохиогч: Norton et al. (1993) эсвэл (Norton et al., 1993).

 

Нэг жилийн хугацаанд нэг зохиогчийн хэвлүүлсэн хоёр болон түүнээс дээш тооны бүтээлийг ялгаж эшлэхийн тулд жижиг үсгийг нэмэлтээр ашиглана, жишээлбэл: Thompson and Heck (2002a, b) эсвэл (Thompson & Heck, 2002a, b). Бичвэрт олон бүтээлийн эшлэлийг он цагийн дарааллаар жагсааж бичнэ (цагаан толгойн дарааллаар бус) жишээлбэл: (Smith, 1985; Johnson, 1990; Beynon, 2001). 

Олон өгүүлэл бичсэн нэг зохиогчийн бүтээлийг он цагийн дарааллаар байрлуулна. Сэтгүүлийн нэрийг дэлгэрэнгүй хэлбэрээр нь бичих шаардлагатай. Түүнчлэн сэтгүүлийн дугаар боть (цуврал), өгүүллийн хуудасны дугаар зэргийг бичнэ. 

Өгүүллийн төгсгөлд “Эшлэл” хэсэгт эш татсан бүтээлүүдийг дахин оруулахыг анхаарна уу:

APA хэв маяг нь цахимаар хүлээн авахад ач холбогдолтой тул цаасаар хэвлэгддэг сэтгүүлд өгүүллийн төгсгөл эшлэлийг дахин оруулах шаардлага үүссэн.

• Бичвэрт эш татсан бүх бүтээлийг зохиогчийн нэрийн эхний үсгийн дарааллаар жагсааж өгүүллийн төгсгөлд эшлэлийн жагсаалтад оруулна. Эшлэлийн жагсаалтад хамтран зохиогчдын нэрсийг нэг бүрчлэн бичнэ.

Эшлэл хэсэгт эш татсан бүтээлүүдийг дараах загвараар бичнэ, дугаарлаж, хоёр талаас тэгшилж бичнэ. Зохиогчийн нэр. Он. Бүтээлийн нэр. Ном, сэтгүүлийн нэр. Дугаар. Хуудас.

1. Wiklund, C. G., Kjellen, N. & Isakson, E. 1998. Mechanisms determining the spatial distribution of microtine predators on the Arctic tundra. Journal of Animal Ecology, 67: 91–98.
2. Dhaliwal, G. S. 1970. Impact of chemical control on honey bees. Pesticides (Bombay), 4(11): 17–19.
3. Cramp, S. & Simmons, K. E. L. 1980. The Birds of the Western Palearctic. Oxford University Press, Oxford, 356 pp.
4. Brothers, D. J. & Finnamore, A. T. 1993. Superfamily Vespoidea. In Goulet, H. & Huber, J. T. (eds.): Hymenoptera of the World: An Identification Guide to Families. Agriculture Canada, Ottawa, pp. 161–278.

Ашигласан бүтээлийн жагсаалт: Дараах форматаар бичнэ.

Бичиглэл: Arial 11, Sentence case, хоёр талаас тэгшилж, дугаарлаж бичнэ.

Загвар: Зохиогчийн нэр. Он. Бүтээлийн нэр. Хот.

1. Wiklund, C. G., Kjellen, N. & Isakson, E. 1998. Mechanisms determining the spatial distribution of microtine predators on the Arctic tundra. Journal of Animal Ecology.

Хураангуй: Өгүүллийн үндсэн үр дүн ба гол дүгнэлтүүдийг нэгтгэн, ажлын ач холбогдлыг илэрхийлэхүйц хураангуйлсан бичвэр. Хураангуйг 200 үгэнд багтаасан байна. Хураангуйд товчлол, эшлэл хийхгүй.  Англи хэл дээр Summary гэж гарчиглан бичсэн байна.  

Бичиглэл: Arial 11, Sentence case, хоёр талаас тэгшилж бичнэ.

Өгүүллийн гарчиг, зохиогчийн нэр англи хэл дээр: Summary-гийн ард орчуулан бичсэн байна. Arial 12.

 

Техникийн шаардлага хангасан байх.

• Хэмжээ: Ашигласан бүтээлийн жагсаалт, хураангуй зэргийг оролцуулаад A4-ийн 10 нүүрээс хэтрэхгүй.
• Захаас авах зай: (инчээр)
• Үсгийн фонт: Arial 12
• Гарчиг: Arial 14, UPPERCASE
• Мөр хоорондын зай: 1.15, параграфын өмнө болон хойно зай нэмэхгүй байх
• График, хүснэгт, зургийн дор тайлбар оруулах. Arial 10 хэмжээгээр, дугаарлаж оруулна.

Хүснэгт: Хүснэгт бүр дараалсан дугаар, түүнд багтаасан өгөгдлийн агуулгыг илэрхийлэх нэртэй байх ба хүснэгтийн мөрүүдийг нэг нэгжийн зайтай бичиж, дараалуулан дугаарлана. Нэмэлт мэдээллийг (жишээлбэл, статистикийн шинжилгээний үр дүн) хүснэгтийн доор зүүлт хэлбэрээр бичнэ. Зураг, хүснэгтийг бэлтгэхдээ хуудасны хэмжээнд багтахуйц буюу өргөн нь 160 мм, өндөр нь 240 мм, баганын өргөн нь 75 мм-ээс илүүгүй байх  шаардлагатай. 

 

Зураг: Бүх зураг нэр, дугаартай байх ба нэр нь түүний агуулгыг товчоор илэрхийлсэн байх ёстой. Өгүүлэлд оруулах фото зураг нь өнгөт эсвэл хар-цагаан, хэвлэлийн шаардлага хангахуйц өндөр нягтаршилтай байх шаардлагатай. 

Хүснэгт, зургийг текст дотор Зураг 1; Зураг 1-2; Хүснэгт 1; Хүснэгт 1-3 гэх мэтээр дурдах ба тэдгээрийн зохих байршлыг бичвэрт тэмдэглэнэ. Нэг ижил өгөгдлийг зураг ба хүснэгтэд давхардуулан оруулж болохгүй.

 

2.3 Өгүүллийг сэтгүүлд ирүүлэх

Манай сэтгүүлд бүтээлээ хэвлүүлэхтэй холбоотой асууж, тодруулах зүйл байвал сэтгүүлийн редактор Д.Идэржаргалтай iderjargal@num.edu.mn имэйл болон 976-88402503, 976-77307730-2314 утсаар холбогдоно уу. 

Өгүүллийг 2023.11.01-ний дотор сэтгүүлийн эрхлэгч-ерөнхий редактор М.Зулькафилийн zulikhaphil@yahoo.com болон iderjargal@num.edu.mn гэсэн хоёр хаягт илгээнэ.

Өгүүллийн зохион байгуулалт, техникийн шаардлагын аль нэгийг хангаагүй бол хүлээн авахаас татгалзан, зохиогчид буцаах болно.

Өгүүллээ илгээхдээ зохиогчийн мэдүүлэг болон зохиогчийн эрх шилжүүлэх гэрээг хэвлэн, шаардлагатай мэдээллийг бөглөж сканердаад хамтад нь илгээнэ. Зохиогчийн мэдүүлэг болон зохиогчийн эрх шилжүүлэх гэрээгүй өгүүллийг хүлээн авах боломжгүй.

Хянан магадалгаа хийгдэж, шинжээчдээр уншуулах учраас хугацаа хоцорсон өгүүллийг хүлээн авах боломжгүй.

 

 

Хавсралт 1.  

МУИС-ийн “Сэтгүүл зүй” сэтгүүлийн редакцад

 

Зохиогчийн мэдүүлэг

Би/Бид МУИС-ийн “Сэтгүүл зүй” эрдэм шинжилгээний сэтгүүлийн 2021 оны дугаарт ......................................... гарчигтай өгүүллээ хэвлүүлэх хүсэлтэйг хүлээн авна уу.

1. Бүх зохиогчид энэхүү өгүүллийг уг сэтгүүлд хэвлүүлэхийг зөвшөөрч байгаа бөгөөд аливаа асуудлаар сэтгүүлийн редакцтай харилцаж, шийдвэрлэхийг холбоо барих зохиогчид итгэмжилсэн болно.
2. Энэхүү өгүүлэл урьд өмнө хэвлэгдэж байгаагүй бөгөөд цаашид өөр хэвлэлд давтагдаж хэвлэгдэхгүй болохыг баталж байна.
3. Энэхүү өгүүлэл нь аливаа хувь хүн, аж ахуйн нэгжийн зохиогчийн эрх болон бусад эрхийг зөрчөөгүй бөгөөд бусдыг доромжилсон, гүтгэлгийн шинжтэй, залилан мэхлэлтийн шинжтэй г.м. хууль зөрчсөн ямар нэг мэдээллийг агуулаагүй болно.
4. Өгүүлэл нь “Сэтгүүл зүй” эрдэм шинжилгээний сэтгүүлийн өгүүлэлд тавигдах зохион байгуулалтын болон техникийн шаардлагыг бүрэн хангасан.

 

Мэдүүлсэн:

Холбоо барих зохиогчийн овог, нэр: ..............................

Цахим хаяг: .....................................

Утас: ...............................................

Зөвшөөрсөн хамтран зохиогчдын овог нэр, гарын үсэг:

.........................................................................

.........................................................................

..........................................................................

 

Хавсралт 2. 

МУИС-ийн “Сэтгүүл зүй” сэтгүүлийн редакцад

 

 

ЗОХИОГЧИЙН ЭРХИЙГ ШИЛЖҮҮЛЭХ ГЭРЭЭ

 

Сэтгүүлийн нэр: ……………………………………………………

Ерөнхий редакторын нэр: доктор, проф М.Зулькафиль (Sc.D)

Өгүүллийн нэр: …………………………………………………………………

Зохиогчдын нэрс: ………………………………………………………………………

 

Зохиогчийн эрхийн шилжүүлэг

1. Зохиогчид өгүүллээ хэвлэмэл болон цахим хэлбэрээр хэвлэн нийтлэх, олон нийтэд түгээх, худалдан борлуулах эрхийг сэтгүүл болон хэвлэлийн газарт шилжүүлэв.
2. Сэтгүүл болон хэвлэлийн газар нь хэвлэгдсэн өгүүллийг арилжааны бус зорилгоор олон нийтэд түгээх, анхдагч эх сурвалжийг эшилсэн тохиолдолд бусад бүтээлдээ нээлттэйгээр ашиглах эрхийг зохиогчдод олгов.

 

 

 

Ерөнхий редакторын гарын үсэг: _________________  Огноо ____________

Холбоо барих зохиогчийн гарын үсэг: ______________ Огноо ____________

 

 

 

  

 

• Сэтгүүл зүй сэтгүүлийн 2025 оны дугаарт өгүүлэл хүлээн авна

  2025-10-09

  МУИС-ийн Сэтгүүл зүй, олон нийтийн харилцааны тэнхимээс эрхлэн гаргадаг “Сэтгүүл зүй” эрдэм шинжилгээний бичиг нь сэтгүүл зүй, олон нийтийн харилцааны салбарыг хамарсан эрдэм шинжилгээний ажлыг нийтэлдэг. Манай сэтгүүлийн бүх дугаар МУИС-ийн эрдэм шинжилгээний сэтгүүлүүдийн нэгдсэн системд нээлттэй байршдаг бөгөөд DOI дугаар олгодог.

  2001 оноос хойш тасралтгүй хэвлэгдсэн, жилд нэг дугаарыг 12 дугаар сард тогтмол хэвлэдэг.

  Сэтгүүлд эрдэм шинжилгээний өгүүллээс гадна тойм өгүүлэл, номын шүүмж зэргийг хэвлүүлэх боломжтой.

  Өгүүллийг зөвхөн монгол хэл дээр хүлээн авна.

  Read More Read more about Сэтгүүл зүй сэтгүүлийн 2025 оны дугаарт өгүүлэл хүлээн авна