БНМАУ-ын харьяат бологсдын судалгаа (1961-1990 он)

Abstract

1911 онд Монгол Улс тусгаар тогтнолоо зарласан цагаас эхлэн Монгол угсаатнаа нэгтгэх бодлогыг ХХ зууны дунд үе буюу 1945 оны Чөлөөлөх дайныг дуустал тууштай барьж ирсэн билээ. Гэвч тухайн үеийн геополитикийн нөхцөл байдал, их гүрнүүдийн ашиг сонирхлоос шалтгаалж энэхүү бодлого тэр бүр амжилт олсонгүй. 1949 онд БНХАУ байгуулагдсанаас хойш, ялангуяа 1960 оноос БНМАУ гадаад, дотоод бодлогодоо бүх талаар социалист интернационалч бодлого явуулж эхлэн үндэсний үзлийг илтээр буруушаан, хориглож, үндэстнээ нэгтгэх бодлого ил байдлаар алга болжээ. Гэвч бодит байдал дээр БНМАУ гадаадын иргэдийг харьяат болгон авахдаа монгол угсаатныг илүүтэй харьяат болгон авч байсан бөгөөд монгол угсаатнаа нүүлгэн ирүүлэх угсаатан-хүн ам зүйн бодлого социалист интернационалч үзлийн цаана ч далд байдлаар үргэлжилж байв.